Fréttatilkynning

Barnamenningarhátíð

Í tilefni af Barnamenningarhátíð mun Minjasafn Reykjavíkur bjóða upp á fjölbreytta dagskrá flesta daganna.
Þann 19 – 21. apríl verður frístundaheimilum ÍTR boðið að taka þátt í  brúðugerðar-námskeiði  í Árbæjarsafni.  Það námskeið verður síðan endurtekið gestum og gangandi að Fríkirkjuvegi 11,  laugardaginn 24. apríl frá kl. 13 til 16.

Á sumardaginn fyrsta kl 13 til 16 verða leikir í Hallargarðinum við Fríkirkjuveg. Börnum (og fullorðnum) verður boðið að taka þátt í ýmsum fjörugum leikjum sem stundaðir voru í Reykjavík á liðnum öldum.

Barnasýningin „Komdu að leika“  sem er til húsa í gamla íþróttarhúsi ÍR í Árbæjarsafni verður opin sumardaginn fyrsta,  kl. 13 til  17.

Safnanótt 2010

Árbæjarsafn verður opið á safnanótt frá kl. 20 til miðnættis. Dagskrá
safnanætur er að þessu sinni tileinkuð draumum og draumaráðningum. Á
Árbæjarsafni mun Símon Jón Jóhannsson halda erindi um draumaráðningar kl. 20
og 21 og bjóða gestum að ráða drauma þeirra. Einnig verður boðið upp á
rökkurleiðsögn um safnsvæðið og kíkt inn í Árbæinn þar sem gestir geta
kynnst því hvernig var að ganga um dimm göng og herbergi áður en rafmagnið
kom til sögunnar. Rökkurgöngurnar verða farnar kl. 22 og 23.
Leikfangasýningin Komdu að leika verður einnig opin og ætti hún að henta
gestum á öllum aldri, þó kannski sér í lagi yngstu kynslóðinni.

Á safnanótt, 12. febrúar kl. 20 flytur dr. Guðrún Nordal erindi á Landnámssýningunni
og nefnist það Draumar í Sturlungu og draumarnir okkar
Í erindinu verður fjallað sérstaklega um þær vísur sem opinberast fólki í draumi í frásögnum. Í draumvísunum er fallvaltleiki hins jarðneska lífs settur í samhengi við æðri heim, annað líf. Skáldin fólu skilning sinn á bardaganum á Örlygsstöðum í myndum sem kalla fram lýsingar úr Völuspá og Sólarljóðum. Vísurnar eru samkvæmt skilgreiningu ekki hægt að eigna neinum lifandi karli eða konu, og þær opinberast auk þess óþekktum persónum svo segja má að vísurnar túlki tilfinningu og hræðslu alþýðu manna sem stendur hjá, fremur en skoðanir þeirra höfðingja sem léku stærstu hlutverkin í atburðum Sturlungaaldar. Leiðsagnir verða um sýninguna kl. 21, 22 og 23.

Minjar við Grímsstaðavör verða varðveittar. Hugmyndir um útræði úr vörinni

Mánudaginn 16. apríl hélt Reykjavíkurborg opinn fundur um varðveislu minja um útræði úr Grímsstaðavör við Ægisíðu í Víkinni, Sjóminjasafni Reykjavíkur. Um sjötíu manns sóttu fundinn og var meirihluti fundarmanna íbúar í nágrenni Grímsstaðavarar en aðrir komu úr öðrum hverfum borgarinnar og jafnvel úr öðrum sveitarfélögum.

Fundurinn hófst á erindi Kjartans Magnússonar, formanns menningar- og ferðamálaráðs, um varðveislu menningarminja í Grímsstaðavör. Rakti hann sögu staðarins og vinnu starfshópsins sem skipaður var af borgarráði til að fjalla um þetta efni. Kjartan sagði að fullur vilji væri fyrir því hjá borgaryfirvöldum að varðveita með reisn þær minjar sem enn er að finna í vörinni. Ennfremur væri til skoðunar að flytja fleiri minjar, sem tengjast gömlum atvinnuháttum, í vörina, t.d. fiskhjall við Lambhól. Kjartan sagði að starfshópur um verkefnið hefði jafnframt til skoðunar ýmsar hugmyndir um minjastarfsemi á þessum stað, m.a. að hefja aftur útræði úr vörinni og gefa þannig nýjum kynslóðum Reykvíkinga kost á að sjá með eigin augum hvernig nær allur fiskur við Íslands um aldir var veiddur og verkaður.

Að erindinu loknu gafst fundarmönnum tækifæri til að láta skoðanir sína í ljós. Allir, sem tóku til máls, lýstu yfir ánægju með þá fyrirætlan borgaryfirvalda að varðveita minjarnar. Margar nýjar hugmyndir um starfsemi í vörinni komu fram; m.a að þar verði komið upp aðstöðu fyrir húðkeipa (sjókajak) og jafnvel aðstöðu fyrir almenna borgara til að komast á skak. Flestir voru sammála um að ekki mætti gera skúrana of fína því að þá myndi þeir missa þann sjarma sem er einkennandi fyrir svæðið. Öllum bar saman um að sýna ætti þeirri atvinnugrein sem þarna var stunduð og þeim sem við hana störfuðu tilhlýðilega virðingu.

Fyrirlestur um varðveislu skálarústar frá landnámsöld í Aðalstræti 16

Nýverið lauk síðasta áfanga forvörslu landnámsrústa í Aðalstræti. Í heild var forvarsla rústanna bæði mikið og flókið verk, en jafnframt er hún grundvöllur þess að fornleifarnar varðveitist og að hægt sé að hafa þær til sýnis. Síðasta vetrardagkl. 15 munu Per Thorling Hadsund og Jannie Amsgaard Ebsen forverðir viðNordjyllandsHistoriskeMuseum , sem önnuðust verkið, segja frá vinnu sinni í Aðalstræti. Þessi fyrirlestur er einstakt tækifæri til þess að hlusta á sérfræðinga útskýra þetta verkefni í heild. Þá er fyrirlesturinn einnig tækifæri til þess fá að innsýn í þann mikilvæga en jafnframt hulda þátt safnastarfs sem forvarsla er. Fyrirlesturinn er á vegum Minjasafns Reykjavíkur og verður haldinn á Landnámssýningunni Reykjavík 871+-2 í Aðalstræti 16. Hann verður fluttur á dönsku.

Nánari upplýsingar í síma 411 6370 eða minjasafn@reykjavik.is.

2. apríl 2007, Borgarminjavörður - Minjasafn ReykjavikurMenningar- og ferðamálaráð Reykjavíkur boðar til opins fundar um varðveislu minja um útræði úr Grímsstaðavör við Ægisíðu þann 16. apríl milli klukkan 17 – 19 Fundurinn verður haldinn í Víkinni, Sjóminjasafni Reykjavíkur að Grandagarði 8.

Grímsstaðavör er ein af sjö vörum við Skerjafjörð og þaðan var til skamms tíma stunduð sjósókn. Í Grímsstaðavör eru enn merki um þessa starfsemi, allir þekkja grásleppuskúrana og trönurnar þar sem grásleppa var hengd. Eftir að útræði lagðist þar af hafa margir Vesturbæingar látið í ljós áhuga á því að þær minjar sem þar er að finna verði varðveittar. Menningar- og ferðamálaráð hefur sett á fót starfshóp sem er að skoða með hvaða hætti má varðveita minjarnar. Í ljósi þess er boðað til opins fundar á meðal borgarbúa þar sem þeim gefst tækifæri til að koma á framfæri hugmyndum um varðveislu minja við Grímsstaðavör. Á fundinum mun Kjartan Magnússon, formaður menningar- og ferðamálaráð reifa málið og kynna hugmyndir en síðan verða almennar umræður. Kaffiveitingar í boði.

6.mars 2007, Borgarminjavörður – Minjasafn Reykjavíkur
Reykjavíkurborg hefur í hyggju að stuðla að varðveislu minja við Grímsstaðavör við Ægisíðu. Hér með eru þeir, sem sem geta sýnt fram á að þeir séu eigendur eða forráðamenn svo kallaðra grásleppuskúra eða annarrra mannvirkja við Grímsstaðavör við Ægisíðu, hvattir til að gefa sig fram við Minjasafn Reykjavíkur, Árbæjarsafni við Kistuhyl, 110 Reykjavik, eða á netfangið minjasafn@reykjavik.is, í síðasta lagi mánudaginn 19. mars 2007.

Reykjavíkurborg áskilur sér rétt til að endurbyggja og varðveita í eigin nafni mannvirki við Grímsstaðavör sem ekki hafa fundist eigendur að þegar tilgreindur frestur er liðinn.

Nánari upplýsingar í síma 411 6304 eða minjasafn@reykjavik.is.

6.mars 2007
Menningar- og ferðamálaráð Reykjavíkur hefur skipað starfshóp til að vinna að tillögum um varðveislu minja um útræði úr Grímsstaðavör við Ægisíðu.  Grímsstaðavör er ein af sjö vörum við Skerjafjörð og þaðan var til skamms tíma stunduð sjósókn. Í Grímsstaðavör eru enn merki um þessa starfsemi, allir þekkja grásleppuskúrana og trönurnar þar sem grásleppa var hengd. Eftir að útræði lagðist þar af hafa margir Vesturbæingar látið í ljós áhuga á því að þær minjar sem þar er að finna verði varðveittar. Starfshópurinn hyggst efna til umræðufundar á næstunni, þar sem öllum þeim sem hafa hugmyndir um varðveislu minja við Grímsstaðavör gefst tækifæri til að koma þeim á framfæri. Einnig má koma ábendingum og hugmyndum varðandi varðveislu umræddra minja til formanns starfshópsins, Kjartans Magnússonar borgarfulltrúa. Hann hefur netfangið kjartan@reykjavik.is.

Fundurinn verður auglýstur í fjölmiðlum og á vef Reykjavíkurborgar, www.reykjavik.is.

Mynd:
Uppmælingarteikning –(ísómetría/þrívíddarteikning) sem er á skiltinu.  

 Landnámssýningin Reykjavík 871±2 og Gagarín hljóta Nodem verðlaunin 2006

 Fréttatilkynning um opnun Landnámssýningarinnar Reykjavík 871±2